Sentyabrın 19-da Azərbaycan Ordusunun başlatdığı
antiterror tədbirləri zamanı şəhid olan Məmmədov Samir Aqil oğlu Ağcabədi Şəhidlər
Xiyabanında dəfn edildi.
Dəfn mərasimində şəhidin yaxınları, hərbçilər, Xocalı və Ağcabədi rayon ictimaiyyətinin nümayəndələri və sakinlər iştirak etdilər.
Xocalininsesi.az bildirir ki, Məmmədov Samir Aqil oğlu 2000-ci ilin may ayının 20-də Naftalan şəhərində anadan olmuşdur. Əslən Ağcabədi rayonunun
cəsur oğulların doğulduğu Yuxarı Qiyamaddınlı kəndindəndir. Ata-babası Xocalıda
yaşayıb.
Samir Məmmədov birinci
sinfə 2006-cı ildə Ağdam rayonunun Ergi kəndində gedib. Sonradan ailəsi Goranboy
rayonunda məcburi köçkünlər üçün salınmış Yuxarı Ağcakənd qəsəbəsinə köçüb.
2017-ci ildə Xocalı şəhər 5 saylı tam orta məktəbindən məzun olub.
Vətəni özünə ikinci Ana bilən
Samir uşaqlıq çağlarından Qarabağın azadlığını görməyi özünə təsəlli sayırdı.
Orta məktəbi bitirdikdən sonra, 2018-ci ilin iyul ayından 2020-ci ilin yanvar
ayına qədər Füzuli rayonu ərazisində yerləşən “N” saylı hərbi hissədə nümunəvi
əsgərlik çəkən Samir Ali Baş Komandanımızın döyüş əmrini səbirsizliklə gözləyirdi.
Samir Məmmədov 2020-ci ilin
aprel ayından müddətdən artıq həqiqi hərbi
xidmətə qəbul edilib. Sentyabrın 27-də başlayan Vətən müharibəsində
tankçı kimi iştirak edib. Onun döyüş yolu Talış, Suqovuşan kəndləri və Ağdərə
istiqamətində olub. Müddətdən artıq həqiqi hərbi xidmətə bir neçə aydır başlamasına baxmayaraq, cəsur
döyüşçümüz öz hünəri ilə fərqlənib. Şanlı zəfər tarixinə adını yazdıran Samir
Məmmədovun idarə etdiyi tank üç dəfə vurulsa da, ona verilən döyüş tapşırığını
sona qədər yerinə yetirib. Artıq tankının idarə edilməsinin mümkün olmadığını
görən qorxmaz döyüşçü avtomatı əlinə alaraq irəli atılıb. Samir Məmmədov 44
günlük haqq savaşımızda xidmətlərinə görə Cənab Prezidentin müvafiq Sərəncamına
əsasən, “Vətən müharibəsi iştirakçısı” medalı ilə təltif edilib.
Samir qabaqda
torpaqlarımızın suverenliyi uğrunda hələ bir döyüşünün də olduğunu bilirdi.
Çünki Xocalı soyqırımında şəhid olan atasının bibisi qızı, bibisinin iki
nəvəsinin ruhları Xocalının düşmən tapdağından tamamilə təmizlənməsi ilə
rahatlıq tapacaqdı. Onun döyüş yolunun əsas qayələrindən biri döyüş meydanında
Xocalı qisasını almaq idi. Samir sentyabrın 19-da başlanan antiterror
tədbirlərinin onun qisas arzusunun həyata keçməsi üçün bir imkan sayırdı. Qalib ordunun qalib əsgəri daha bir döyüşdən zəfərlə çıxmaq üçün
budəfəki döyüş tapşırığını da layiqincə yerinə yetirməyə hazır idi. Hədəf,
amal bəlli idi: terrorçuları torpaqlarımızdan təmizləmək, bayrağımızı azad
torpaqlarımızda dalğalandırmaq və suverenliyimizi bərpa etmək.
Antiterror tədbirlərində
Samir Məmmədovun döyüş yolu Ağdərə döyüşləri ilə başladı. İgid tankçımız
verilən tapşırıqları məharətlə yerinə yetirərək terrorçulara sarsıdıcı zərbələr
endirdi. Pusquda dayanan mənfur düşmənin atdığı tank əleyhinə raketlə Samirin döyüş apardığı tank partladılaraq yandırıldı. O, digər tankçı
yoldaşları ilə birlikdə şəhidlik zirvəsinə ucaldı. Sentyabrın 29-u DNT
analizinin cavabına əsasən, şəhidimizin cənazəsi son mənzilə salınması üçün
Goranboy rayonunun Aşağı Ağcakənd qəsəbəsində yaşadığı evə gətirildi. Şəhid
Samir Məmmədov izdihamla Vətən müharibəsində şəhid olan bibisi nəvəsi Miriyev Sənan
Arif oğlunun torpağa tapşırıldığı Ağcabədi Şəhidlər Xiyabanında dəfn edildi.
Samir Məmmədovun və digər
şəhidlərimizin qisası düşməndən döyüş meydanında alındı. Şəhidimizin bibisinin
nəvəsi Miriyev Surət Vəli oğlu Vətən müharibəsində olduğu kimi, antiterror
tədbirlərində də qəhrəmancasına döyüşərək yaralandı. Onların amalı, arzusu
qəhrəman əsgər və zabitlərimiz tərəfindən layiqincə yerinə yetirildi. 24 saat
ərzində düşmən diz çökərək ağ bayraq qaldırdı. Bununla da Qarabağda
suverenliyimiz bərpa olundu.
Qəhrəmanlıq salnamələrində adı cəsur tankçı kimi tarixə yazılan Samir Məmmədov xalqımızın qəlbində əbədi yaşayacaqdır. Məkanı cənnət olsun!